تعرف علي الإختبار الطب النفسي

إختبار الطب النفسى :-

من أهم وأصعب الاختبارات الى هتعدى عليها فى التقديم ولو عديتو هتبقي رميت حمل كبير اوى من على ضهرك

الأختبار دة مفهوش اعادة

فلازم تكون رايح نايم كويس وفى كامل تركيزك

- أول ماتدخل من الاكاديمية وتقف مع زمايلك بتوع الطبي وتروحو كلكو تحت المظلة هتتوزعو  طبي لوحدو والنفسي لوحدو بعد كدة هتطلعو على مجموعة او اتنين حسب العدد

هتسلم بطاقتك الشخصية وتدخل مكان زى فصل وتستنى لحد ماتاخد تعليمات الاختبار وتستلم الورقة

الورقة عبارة عن ايه :-

 هتلاقي سؤالين او تلاتة اكمل بنفس التسلسل بارقام سهلة هتعرف تحلها بسرعة

 هتلاقي صورة زى مثلا ساعة وفيها عقارب او دايرة متظللة وبرضة اختر الشكل الى يكمل التلت اشكال الى قدامك

 هتلاقي مثل زى {القرش الابيض ينفع فى اليوم الأسود} او {على أد لحافك مد رجليك} وهتشرح المثل دة معناه اى من وجهة نظرك

- بعد كدة هتدخل على الجزء الاكبر والأهم فى الاختبار

أسئلة (دائما- أحيانا - أبدا)

هتحاول ماتستخدمش احياناً كتير عشان يبان ان فى ثقة فى أجاباتك 

هيجيلك مثلا سؤال زى :-

هل تشعر ان لك قدرات خاصة تميزك 

 هل تستطيع التنبؤ بالاحداث 

بتحب المرتفعات 

طب بتخاف منها 

بتحس ان حد بيراقبك

عمرك هربت من المدرسة 

بتعرف تكون صداقات بسرعة 

بتحس بالأحراج لو بقيت موجود فى مكان ملئ بالجنس الاخر 

بتحس أنك وحيد والدنيا كلها ضدك لما بتكون حالتك النفسية مش كويسة 

حاجات شبه كدة المهم تكون مركز جدا وعارف انت بتكتب ايه وعندك رد على كل سؤال عشان لو اتندة على أسمك وقعدت أدام الدكتور 

خد بالك اوى :-

ان فى أسئلة بتتكرر بأشكال مختلفة ماينفعش أجاباتك تتناقض {ركز ركز ركز}

- مدة الامتحان 20 دقيقة عشان كدة هتحل بسرعة وتركيز

هتخلص وهتنزلو تحت تستنو تحت المظلة تانى على مايتوزع عليكو البطايق وتتوكل على الله تروح تستنى النتيجة على الصفحة

اليوم مش طويل بس برضو لازم تروح بدرى عشان تخلص بدرى !!