الكشف الطبي للكليات والمعاهد العسكرية بالتفصيل

 الكشف الطبي للكليات والمعاهد العسكرية بالتفصيل
-----------------------------------------------

 دلوقتي حضرتك عديت في كشف السمات الحمد لله ودلوقتي الكشف الطبي اولاً الطبي يومين متتابعين كالاتي :-
المطلوب قبل الكشف
* حلق شعر الراس علي الدرجة 1 أو 2
* غسل الاذن وتلميع الاسنان
* شراء سلب ابيض سبعة للبسة وقت الكشف

----------------
 اليوم الأول
----------------
عياده التناسق : بتدخل علي ميزان الالكتروني بتقيس وزنك وطولك مع بعض وخلي وزنك مثالي يعني اطرح من الطول 100 وده الوزن المثالي

عياده النفسية :  عبارة عن كشف مخارج الحروف واللدغ ودي من العيادات السهله والضابط هيخليك تقول مثلا 44 او 666 او امر امير الامراء وهكذا

عياده الباطنه :  هتدخل تنام علي السرير والدكتور يضغط علي بطنك وخلاص

عياده الأنف والأذن والحنجرة : الدكتور بيبص في الأذن لو الطبله مخرومه  كده والأنف لو فيه اعوجاج في الحاجز الانفي ولو فيه حاجه من دول حاول تعالجهم قبل التقديم وملحوظة لازم تكون غاسل ودانك عند دكتور قبل متروح الكشف

عياده الاسنان : ودي سهله برضو بيشوف الفكين متطابقين ولا لا وبيشوف الدروس لو بايظين

عياده الجراحة :  بتدخل علي الدكتور وتنزل اللبس وبيمسك الخصيتين وبيخليك تكح عشان يشوف فيه دوالي ولا لا وبعد كده بتلف وتوطي وبيشوف فيه عمليات بواسير او عمليات ثانية

عيادات الرمد :  بتقيس النظر عبارة عن لوحه فيها دواير بتقف علي مسافه معينه والعسكري بيشاور علي علامه وانت بتقول مفتوحه في انهي اتجاه وطب عسكري وفنيه عسكريه مسموح ليهم يكشفوا بالنضاره

عمي الألوان : ودي بتبقي قبل ما تدخل عياده الرمد بيبقي فيه ضابط واقف بورق وفيه ارقام وانت بتقولو العدد اللي مكتوب كام 

عياده العظام : ودي من اصعب العيادات اللي كتير بيسقط فيها بتدخل تقف سبعه بيشوف شكل الجسم لو مش متناسق بيطلعك من قبل ما الكشف يبدأ وبعد كده بيشوف التقوس واللتصاق الفخدين وتراكب الركب وعدم تناسق الفقرات وهيخليك تعمل 3 ضغطات وحوالي 3 عقله وياريت تركزو في الكشف ده

عياده الجلديه : بتدخل العياده والدكتور بيشوف عرق الايدين اللي عندو املاح كتير بيخرج وبعد كده بيشوف حب الشباب لو كتير هتسقط وبعد كده بيشوف لو فيه غرز أو تعاوير لو فيه بشكل كبير بتخرج وبيشوف الحروق والوحمات لو فيه باينين اوي بتخرج

بعد متخلص كده اليوم الأول خلص هتروح تلبس هدومك وتستني عشان تسمع نتيجتك ... بعد متخلص هتلبس لبسك وتستني نتجتك

-----------------------------------------------

----------------
اليوم التاني
----------------

عياده اشعه علي الصدر : دي عباره عن جهاز بتحط صدرك عليه وده سهل ان شاء الله

عياده القلب : الدكتور بيحط سماعه علي قلبك وبيشوف نبضات قلبك وحاول وانت داخل العياده دي تبقي هادي ومتجريش عشان ضربات قلبك متزدش

عياده رسم القلب :  بتنام علي السرير وبيركب جهاز علي قلبك ومشابك كده في رجلك وايدك وبيطلع رسم القلب من جهاز

عياده الموجات الصوتيه : دي بتبقي اشعه علي الكليتين

عياده قاع العين : وما ادراك ما قاع العين هيتحطلك قطره بتحرق العين وبتدخل تقف صف والدكتور بيعدي منظار علي العين بعد كده بتقعد علي جهاز بتحط عينك فيه والجهاز وده بيكشف حالات الحول والنظر الضعيف وعمليات الليزك