الاختبار الرياضي من خريجي الجامعات بكلية الشرطة

متخصصين حقوق أجمع فى البوست الاختبار الرياضي
اختبار مهم ودرجتو بتأثر فى نتيجة قبولك أو لا
عشان كدة ياريت تكون نايم كويس وتاكل اى حاجة تديك باور قبل ماتدخل وتبعد عن اى حاجة فيها صودا وماتشربش كتير قبل ماتدخل سواء ماء او عصير، ياريت تاكل تمر او فاكهة قبل ماتدخل

 تفاصيل اليوم :-
بعد مابتتجمع مع زمايلك بتدخلو تقعدو تحت المظلة الى عند حمام السباحة الاوليمبي تستنى الظابط يدخل ينادى الكروت بالاسماء وبتتقسم مجموعتين او اكتر على حسب العدد

بتبدأ بأختبارين نتيجتهم بتحدد هتكمل باقي اختبارات ولا لا

- قفزة الثقة على ارتفاع 7.5 متر ولو مانطيتش بتاخد غير لائق ومابتكملش وليك حق فى التماس
لو ماتدربتش عليها قبل كدة كل الى عليك انك ماتفكرش ف اى حاجة واول ماتقول اسمك هتدخل وانت ماسك المايوة وايدك ورجلك مضمومين باصص ادامك مش باصص للماية خالص اول مايقولك تقدم هتطلع لحد الـ start وصوابع رجلك هتكون برة وهتاخد الامر فاتنط بدون اى تردد
الناس الى مابتعرفش تعوم ماتقلقش هتكون لابس
 لايڤ جاكيت وفى ظابط هيكون موجود فى البسين
 يطلعك على طول.
- الاختبار المهارى عبارة عن حواجز حديد بتزحف من تحتها و بتنط من فوقها و تجرى بينها وفى كورة وزنها حوالى 7 كيلو بتكون شكل كورة الباسكت ياريت تركز وانت بتشيلها علشان ماتقعش من ايدك
لو كسرت الزمن الى هو 27 ثانية بتاخد غير لائق ومش هتكمل اختبارات وليك حق الالتماس .

بعد كدة لو انت لائق بتخش خمس اختبارات درجاتهم من 400 لازم تجيب 200 علشان تنجح
- العقلة ودى عبارة عن 16 عدة ب80 درجة لازم رقبتك تعدى العقلة الحديد ودراعك يتفرد على الاخر عشان يتحسبلك عدة.
- وثب من الثبات 240سم برضو ب80 درجة
(هتنط برجلك الاتنين).
- المرونة أوثنى الجزع على الساق ودى برضو ب80 درجة
(بتقعد على الارض وتتنى وسطك على رجلك اكنك بتعمل استرتش للعضلة الخلفية وبيكون فى مسطرة بعد رجلك بيشوف ابعد مسافة ايدك هتوصلها هتكون كام سم).

(بعد كدة الاتوبيس بياخد الطلبة لملعب كرة القدم علشان اختبارات العَدو)

- الاسبرنت 100 متر زمن اول 13ثانية تاخد ال80 درجة ولو عديت 16 ثانية هتاخد 0.
- الضاحية 1000متر وزمنها الاول 3.45 دقيقة تاخد 80 درجة وبعد كدة الدرجات بتفضل تقل لحد الزمن السابع
تاخد صفر.

بعد كدة تتوكل على الله وتستنى النتيجة على الموقع

لو لاقدر الله اسمك اتندة بعد الاختبار المهارى فانت كدة غير لائق مهارى ولما تعمل التماس هتعيد من أول المهارى يعنى مش هتنط ثقة تانى.
لو كنت دخلت الخمس اختبارات الى عليهم تجميع درجات وجالك على الموقع غير لائق فانت كدة درجتك معداتش الـ 200 من 400 وهتعيد من اول العقلة.

يوم الالتماس لوحدو يعنى هتروح تدفع الرسوم ويحددلك يوم تختبر فيه.

ماتعدش لنفسك درجات وتقول انا كدة لائق او لا انت كل الى عليك انك تطلع احسن ماعندك فى كل اختبار وملكش دعوة بالدرجات.