اماكن ومواعيد والاوراق المطلوبة للكلية الحربية

1 – سحب الملفات منين ؟

* سحب الملفات من مكتب التنسيق للكليات العسكرية امام الكلية الحربية بطريق صلاح سالم – المالظة .

المواصلات من ميدان رمسيس تركب مكروباصات الكلية الحربية .

او تركب مترو خط العتبة – العباسية هتطلع من محطة مترو العباسية هتلاقى مكروباصات بتودى الكلية الحربية .

* اما شرطة الملف بيكون ع النت وذلك بعد نتيجة الثانوية العامة والاعلان عن قبول الدفعة الجديدة والملف الورقي بيكون بعد اختبار القوام .

2 – مواعيد سحب الملف ؟

* حربية من 1/7 لـ 14/8 ان شاء الله اما شرطة بعد نتيجة الثانوية .

3 – يوم سحب الملف ايه النظام ؟

* باب الكلية بيفتح الساعة 6 بتدخلوا تقعدوا ف مظلة و بيكون في مظلة للأهالي لو جايب معاك اهلك .

لازم لازم لازم تيجي بالبطاقة مش هينفع تدخل من غيرها وتجيب معاك قلم جاف عشان هتحتاجه .

هتتقاس وتتوزن مبدئيا كدة وتدفع 100 جنيه لسحب الملف وهتتصوروا وبعد كدة هتخشوا مسرح والظابط هيشرحلكم ازاي تملوا الملف وبعدها تستلموا الصور وتمشوا 

4 – لو ورقة ناقصة ف الملف اعمل ايه ؟

* عادي بتروح ع شباك الاستعلامات تقوله الورقة رقم كذا ناقصاني وهيديهالك متقلقش .

5 – مواعيد تقديم الملف ؟

* موعد تسليم الملف بيكون مختوم ع الملف من الخارج ع اول صفحة ولو مش موجود قدم الملف خلال اسبوعين من السحب او بحد اقصي قبل 14/8 .

6 – الأوراق المطلوبة في الملف ؟ (ملحوظة : دي أوراق المرحلة الأولي فقط أما بعد الطبي بتقدم أوراق المرحلة الثانية والفرق بس بيكون في قيد الجدين)

***حربية***

صورة البطاقة الشخصية للطالب + صورة طولية للطالب دي بتستلمها اما بتروح تسحب الملف وتتصور + صورة معتمدة من شهادة المؤهل (الثانوية) أو أصل بيان الدرجات (يكتب مقدم إلي مكتب تنسيق الكليات العسكرية) + أصل شهادة ميلاد الطالب + صور شهادات التفوق الرياضي (إن وجد) + أصل اثبات القيد من الكلية أو المعهد المقيد به الطالب (اذا كان الطالب مقيد بكلية أو معهد) + أصل القيد العائلي للوالد (يستخرج من مصلحة الأحوال المدنية عن طريق صورة بطاقة الوالد وصورة بطاقة الوالدة ووثيقة زواج كمبيوتر وصور بطايق أو شهادات ميلاد الأبناء ولو في حد متوفي بتاخد صورة شهادة وفاته) + صورة معتمدة من قرار الوصاية وصورة بطاقة الوصي (في حالة وفاة الوالد فقط) + صورة البطاقة الشخصية للوالد + صورة معتمدة من مؤهل الوالد + صورة البطاقة الشخصية للوالدة + صورة كارت طولي للوالدين (يعني والدك ووالدتك يقفوا يتصوروا جنب بعض ف صورة واحدة طولية ولو في حد منهم متوفي او مسافر بتصور الطرف الموجود وبتكتب ف ظهر الصورة سبب غياب الطرف الاخر) + صورة شهادة مؤهل الوالدة + صور مستندات الأملاك والمدخرات والحيازات والأسهم للوالد (يعني أي حاجه بيملكها والدك زي الشقة والارض وهكذا) + صور مستندات الأملاك والمدخرات والحيازات والأسهم للوالدة (يعني أي حاجه بتملكها والدتك زي الشقة والارض وهكذا)